Првиот контингент хеликоптери од Албанија ќе се приклучи на мисијата на НАТО КФОР во Косово.

Албанското Министерство за одбрана соопшти дека 13 припадници на албанските вооружени сили, ќе бидат дел од оваа мисија на Алијансата.

Во својот поздравен говор на церемонијата, албанскиот министер за одбрана Ермал Нуфи ја опиша оваа посветеност како доказ за професионализмот на албанската армија и одговорностите што „Албанија ги исполнува како посветен сојузник во НАТО“.

„Контингентот што го испраќаме денес е дел од овие напори. Тоа покажува дека воздухопловните сили ја прошируваат својата улога и дека нашите вооружени сили ги зајакнуваат своите капацитети за да можат да извршуваат сè поважни задачи во рамките на НАТО. За Албанија, оваа мисија има посебно значење, не само поради братските и историските врски со Косово, туку и затоа што безбедноста и стабилноста на Косово се директно поврзани со мирот и безбедноста на Албанија и целиот наш регион“, рече Нуфи.

Тој додаде дека придонесот на Албанија кон меѓународната безбедност не е ограничен само на оваа мисија, туку, според него, таа е дел и од операциите на НАТО, Европската Унија и Обединетите нации.