Германската владејачка коалиција се согласи да воведе данок на пијалоци засладени со шеќер почнувајќи од 1 јули 2027 година, со што се надминаа разликите во ставовите што претходно ја одложуваа оваа мерка, потврди Министерството за финансии.

Според нацрт-документот до кој дојде германскиот медиум RND, за пијалаците што содржат најмалку 5 грама шеќер на 100 милилитри ќе се применува данок од 26 центи по литар, а за оние со 8 или повеќе грама, износот ќе се зголеми на 32 центи по литар. Се очекува Владата да го одобри планот денес.

Министерот за финансии Ларс Клингбајл од Социјалдемократската партија (SPD) има за цел да обезбеди приходи за федералниот буџет, а истовремено да ги поттикне производителите да ја намалат содржината на шеќер и да понудат поздрави производи. Според проценките на надлежните, данокот би требало да донесе приход од околу 690 милиони евра (773 милиони долари) во 2027 година и 925 милиони евра (1,04 милијарди долари) во 2028 година.

Кабинетот на канцеларот претходно овој месец го блокираше предлогот на Клингбајл, според информациите на јавниот сервис ARD. Канцеларот Фридрих Мерц се соочи со притисок од својата конзервативна партија CDU, откако неколку партиски функционери на ниво на сојузни држави оценија дека данокот претставува државна интервенција и ќе наметне непотребни трошоци за потрошувачите.

Мерката доаѓа во време кога Германците консумираат многу повеќе шеќер отколку што препорачува Светската здравствена организација (СЗО). СЗО советува луѓето со здрава телесна тежина да го ограничат внесот на шеќер на најмногу 50 грама дневно, а по можност на помалку од 25 грама, односно околу шест кафени лажички. Мажите во Германија во просек консумираат 78 грама дневно, а жените 61 грам. Ако се земат предвид и другите извори на шеќер, дневниот внес може да достигне и до 100 грама.