Шеесет и шестгодишна пациентка на Kлиниката за инфективни болести и фебрилни состојби починала од западнонилска треска, со што вкупниот број починати од вирусот во Северна Македонија се искачи на 11.
Директорот на клиниката, Фадил Цана, вчера соопшти дека пациентката од Росоман починала од тешка форма на болеста, кај која бил зафатен централниот нервен систем.
Тој рече дека пациентката имала повеќе придружни хронични заболувања и дека нејзината клиничка состојба била многу тешка.
Цана информираше дека на клиниката е хоспитализирана и друга пациентка со тешка форма на болеста, која речиси еден месец е на одделот за интензивно лекување и е на механичка вентилација.
Тој истакна дека охрабрува фактот што од 25 септември не е регистриран ниту еден нов случај на хоспитализација.
Од почетокот на 2026 година се евидентирани вкупно 71 случај на зараза со вирусот. Од заболените, 58 лица оздравеле, додека двајца пациенти и натаму се на болничко лекување.
Од 11 починати, десет биле мажи.
