Turkish Airlines dhe CFM International nënshkruan të premten një memorandum mirëkuptimi për blerjen e më shumë se 300 motorëve të avionëve dhe ofrimin e shërbimeve afatgjata të mirëmbajtjes për një flotë prej mbi 600 motorësh, njoftuan kompanitë.
Motorët e rinj, përfshirë ata rezervë, do të përdoren në deri në 150 avionë Boeing 737 MAX, sipas një porosie të njoftuar në fund të shtatorit, e cila përfshin 100 porosi të konfirmuara dhe 50 opsione shtesë, thuhet në një njoftim për shtyp.
Marrëveshja për shërbimet do ta mbulojë gjithë flotën e motorëve LEAP-1B të Turkish Airlines dhe filialit të saj AJet, përfshirë motorët e porositur ose të dorëzuar më parë, motorët rezervë, ata që përdoren në avionët e marrë me qira dhe porositë e mundshme shtesë.
Memorandumi përfshin gjithashtu një marrëveshje për shërbime materiale që do ta mbështesë krijimin e një qendre për mirëmbajtjen, riparimin dhe remontin e motorëve (MRO) në Türkiye.
Marrëveshja u nënshkrua gjatë një ceremonie në Stamboll nga kryetari i Turkish Airlines, Murat Seker, drejtori ekzekutiv i Turkish Technic, Mikail Akbulut, dhe drejtori ekzekutiv i Safran, Olivier Andries. Safran është njëra nga dy kompanitë mëmë të CFM-së.
Seker tha se marrëveshja do ta mbështesë zgjerimin e flotës së kompanisë ajrore, rrjetit të fluturimeve dhe efikasitetit operacional.
“Jemi të kënaqur që po e forcojmë partneritetin tonë me CFM-në, me të cilën kemi bashkëpunuar prej shumë vitesh, përmes një pakete gjithëpërfshirëse shërbimesh”, tha ai.
“Ky bashkëpunim do ta sigurojë ekspertizën, besueshmërinë dhe mbështetjen e nevojshme për zhvillimin e kapaciteteve tona për mirëmbajtjen, riparimin dhe remontin e motorëve LEAP”, shtoi ai.
Akbulut tha se Turkish Technic do t’i zgjerojë kapacitetet për mirëmbajtjen e motorëve duke ofruar shërbime gjithëpërfshirëse për motorët LEAP, ndërsa do të vazhdojë investimet krahas veprimtarive të konsoliduara të mirëmbajtjes së avionëve dhe komponentëve të tyre.
Andries e cilësoi marrëveshjen një tjetër moment të rëndësishëm në partneritetin gati katërdekadësh, duke thënë se ajo do ta mbështesë rritjen dhe zgjerimin e flotës së Turkish Airlines.
Kryetari dhe drejtori ekzekutiv i GE Aerospace, H. Lawrence Culp Jr., tha se bashkëpunimi do ta mbështesë zgjerimin e rrjetit të kompanisë ajrore me bazë në Stamboll dhe zhvillimin e kapaciteteve të saj për mirëmbajtjen e motorëve.
Duke përfshirë edhe flotën e AJet, Turkish Airlines aktualisht operon 96 avionë Boeing 737 Next Generation, të pajisur me motorë CFM56-7B, dhe 79 avionë Boeing 737 MAX, të pajisur me motorë LEAP-1B.
CFM-ja ka dorëzuar më shumë se 10.000 motorë LEAP që nga hyrja në shërbim e kësaj familjeje motorësh një dekadë më parë, ndërsa flota ka regjistruar gjithsej mbi 100 milionë orë fluturimi, thuhet në deklaratë.
