Skema e re e mbështetjes në bujqësi në Shqipëri për vitin 2026 ka hyrë zyrtarisht në fuqi, ndërsa pritet publikimi i udhëzimit përkatës që do të përcaktojë kriteret dhe hapjen e aplikimeve për fermerët.

Programi mbështetet në një fond prej 52 milionë eurosh dhe sjell ndryshime të rëndësishme, duke synuar përfshirjen e një numri më të madh përfituesish dhe rritjen e mbështetjes financiare në disa sektorë kyç të bujqësisë dhe blegtorisë.

Sipas relacionit shoqërues, një nga risitë kryesore është rritja e financimit për krerë në blegtori dhe bletari, si dhe ulja e pragut minimal të tufave, çka pritet të sjellë përfshirje më të gjerë të fermerëve krahasuar me vitet e mëparshme. Ndërkohë, skema e naftës është ristrukturuar, duke kaluar nga mbështetja direkte në kompensim përmes rimbursimit në masën 10 për qind të faturave të shitjes për inputet bujqësore.

Në kuadër të pagesave direkte, skema parashikon subvencione për blegtorët dhe bletarët, si dhe mbështetje për herë të parë për sektorë specifikë si rritja e derrave përmes financimit për dosa të matrikulluara. Gjithashtu, është përfshirë mbështetja për sipërfaqet e mbjella me kultura bujqësore, me një pagesë prej 100 euro për hektar.

Risi tjetër është edhe mbështetja për kontrollin biologjik të dëmtuesve në perime, duke financuar një pjesë të konsiderueshme të kostove për materiale biologjike, si dhe vijimi i mbështetjes për fermat organike dhe certifikimin sipas standardeve ndërkombëtare.

Në komponentin e investimeve, një pjesë e fondit prej rreth 2,5 miliardë lekësh është dedikuar për zhvillimin e fermave, përfshirë grante për fermerët e rinj deri në 10 mijë euro, si dhe financime për ndërtimin dhe përmirësimin e infrastrukturës bujqësore dhe blegtorale. Mbështetje do të jepet edhe për mekanizimin e proceseve të punës përmes subvencionimit të pajisjeve dhe makinerive.

Ministria e Bujqësisë dhe Zhvillimit Rural e Shqipërisë bën të ditur se, në rast se numri i aplikimeve të kualifikuara tejkalon fondin në dispozicion, shpërndarja do të kryhet në mënyrë proporcionale.

Përfitues të kësaj skeme janë fermerët individualë, personat fizikë dhe juridikë, si dhe shoqëritë e bashkëpunimit bujqësor, me synimin për të nxitur prodhimin vendas, rritur konkurrueshmërinë dhe përmirësuar të ardhurat në zonat rurale.