Ministria për Evropën dhe Punët e Jashtme e Republikës së Shqipërisë ka deklaruar se mirëpret marrëveshjen për armëpushimin dyjavor ndërmjet Shteteve të Bashkuara të Amerikës (ShBA) dhe Iranit, e cila sipas ministrisë synon të hapë rrugën drejt një zgjidhjeje të qëndrueshme të konfliktit të përshkallëzuar në Lindjen e Mesme. 

Në një deklaratë të publikuar në rrjetet sociale, ministria thekson se Shqipëria ka mbështetur vazhdimisht përpjekjet për ulje të tensioneve, vetëpërmbajtje dhe dialog kuptimplotë.

"Ndërprerja e furnizimeve globale me energji, përfshirë ndikimin e paqëndrueshmërisë rreth Ngushticës së Hormuzit, vijon të prekë ekonomitë në mbarë botën, duke theksuar urgjencën e rivendosjes së stabilitetit dhe garantimit të rrjedhës së lirë të tregtisë detare. Ne vlerësojmë rolin konstruktiv të luajtur nga Pakistani, Egjipti, Türkiye dhe Arabia Saudite në mbështetje të përpjekjeve për ulje të tensioneve dhe dialog", thuhet në deklaratë.

Sipas deklaratës, respektimi i armëpushimit dhe angazhimi me mirëbesim drejt një zgjidhjeje gjithëpërfshirëse dhe të qëndrueshme do të përbëjnë një kontribut të drejtpërdrejtë për stabilitetin rajonal, sigurinë dhe paqen për të gjithë.

Njoftimi për armëpushim erdhi më pak se dy orë para skadimit të një afati që presidenti i ShBA-së, Donald Trump, ia kishte zgjatur vazhdimisht Iranit për të rihapur Ngushticën e Hormuzit dhe për të pranuar marrëveshje ose do të përballej sipas tij me “shkatërrimin e një qytetërimi të tërë”.