Udhëheqësit e opozitës izraelite ranë sot dakord t'i rekomandojnë presidentit Isaac Herzog, kreun e partisë Yashar, Gadi Eisenkot, për ta formuar qeverinë e ardhshme, duke u zotuar ta zëvendësojnë qeverinë e Benjamin Netanyahut me një "qeveri emergjente kombëtare".

Marrëveshja u arrit pas një takimi të përbashkët të liderëve të partisë opozitare në Herzliya në Izraelin perëndimor-qendror përpara fillimit të konsultimeve në rezidencën e Herzogut të mërkurën.

Deklarata thotë se të gjitha partitë pjesëmarrëse do t'i rekomandojnë presidentit Herzog, Eisenkotin për ta formuar qeverinë e ardhshme dhe se ekipet e tyre negociuese do ta fillojnë menjëherë hartimin e udhëzimeve të politikave dhe marrëveshjeve të koalicionit të nevojshme për të krijuar kabinetin e ri.

"Udhëheqësit e partive janë të koordinuar dhe do të veprojnë menjëherë për të zëvendësuar ‘qeverinë e 7 tetorit’ me një qeveri të emergjencës kombëtare", thanë partitë duke shtuar se do të kërkojnë të realizojnë një “shumicë të qartë parlamentare” në Knesset.

Udhëheqësit diskutuan për hapat që do të ndërmerren gjatë ditëve të para të Knessetit të ri që e synojnë formimin e një qeverie dhe shmangien e zgjedhjeve të tjera, thuhet në deklaratë.

Takimi i sotëm ishte takimi i parë i përbashkët i liderëve të opozitës që nga zgjedhjet e 27 tetorit. Ai mblodhi së bashku Eisenkotin, ish-kryeministrin Naftali Bennett të partisë Together, liderin e Yisrael Beytenu Avigdor Lieberman, Yair Golan të Demokratëve dhe liderin e opozitës Yair Lapid, sipas "The Jerusalem Post".

Zgjedhjet e lanë bllokun e Netanyahut me 53 vende në Knessetin prej 120 vendesh ndërsa opozita siguroi 48 vende dhe partitë arabe fituan 19. Opozita nuk ka 61 vendet e nevojshme për një shumicë parlamentare, duke e bërë mbështetjen e ligjvënësve arabë potencialisht vendimtare në përpjekjet për të formuar qeverinë.