Bullgaria do të ekzaminojë mbetjet e një droni të gjetura në anijen Chelsea 3, e cila u sulmua në Detin e Zi më 13 tetor, deklaroi të martën ministri i Transportit dhe Komunikacionit, Georgi Peev.
Duke folur për gazetarët, Peev tha se agjencitë bullgare të sigurisë do të analizojnë mbetjet dhe do t’i publikojnë rezultatet pas përfundimit të ekzaminimit, raportoi agjencia bullgare e lajmeve BTA.
Sipas tij, anija ndodhet aktualisht në Portin e Burgasit, ndërsa Ministria e Transportit është përgjegjëse për organizimin dhe koordinimin e operacionit.
Peev raportoi gjithashtu një rritje të lehtë të trafikut të anijeve në portet e Varnës dhe Burgasit. Ai tha se inspektimet do të vazhdojnë për të garantuar lundrimin e sigurt në ujërat territoriale bullgare.
Ministri paralajmëroi se aktivitetet ushtarake pranë rajonit mund të kenë pasoja afatgjata.
Ai shtoi se Bullgaria po shkëmben informacione për sigurinë detare me Rumaninë dhe Türkiyen.
