Асоцијацијата на општините на Косово (АКК) протестираше пред Владата на Косово поради, како што велат, „влошувањето на финансиската состојба на општините од страна на Владата“.

Агим Алиу, претседател на АКК, ја обвини Владата предводена од вршителот на должноста премиер, Албин Курти, за „селективен, неподдржувачки и дискриминаторски однос кон општините“.

На протестот на градоначалниците на општините, без поддршка од градоначалниците што доаѓаат од партијата Движење Самоопределување, Алиу рече дека пораката на протестот е: „Не земајте им го на општините тоа што им припаѓа на граѓаните“.

„Кога се оштетува буџетот на општината, не се оштетува само една институција, туку се оштетуваат граѓанинот, ученикот, наставникот, лекарот, земјоделецот, бизнисот и секое семејство што очекува квалитетни услуги од својата општина. Со години на општините им се пренесуваат финансиски обврски што не се создадени од нив и за кои не се обезбедени средства од централното ниво на управување“, истакна Алиу.

Градоначалникот на Општина Приштина, Перпарим Рама, го обвини вршителот на должноста премиер Албин Курти за „сомнителна агенда“.

Тој рече дека Владата ги довела општините во многу тешка состојба.

„Проблемот е што Албин Курти ги користи институциите за да го блокира и казни граѓанинот. Погледнете што се случува со општините. Онаму каде што Самоопределување не победи, Владата ги блокира буџетот и инвестициите“, истакна Рама.

Главните барања на АКК се заштита на буџетите, имотот и општинските надлежности, надоместување на обврските што произлегуваат од колективните договори, примена на стапката за работно искуство од 0,5 отсто од буџетот на централното ниво, надоместување на штетите од поплавите, праведно финансирање на општините и запирање на, како што беше кажано, интервенциите на централното ниво во локалната автономија.