Во Скопје се одржа 15. Меѓународна работилница „Комуникација со иднината“, во соработка меѓу Врховниот совет за радио и телевизија на Туркије (РТУК) и Меѓународниот балкански универзитет (ИБУ).

На отворањето на работилницата, кое се одржа во кампусот на ИБУ, присуствуваа амбасадорот на Туркије во Скопје, Алпер Акташ, претседателот на РТУК, Мехмет Даниш, ректорот на ИБУ, проф. д-р Мехмет Булут, претставници на турски и локални институции и организации во земјата, претставници на академската фела, студенти и гости.

Амбасадорот Акташ во своето обраќање се осврна на влијанието на вештачката интелигенција врз медиумите, посочувајќи дека на работилницата ќе се дискутира за медиумската етика.

Акташ истакна дека работилницата е исклучително важна и нагласи дека студентите треба да ѝ посветат големо внимание.

Претседателот на РТУК, Даниш, рече дека теми на работилницата, во рамките на најновите случувања, ќе бидат вештачката интелигенција, медиумската етика и дигиталната безбедност.

„Со овие работилници, кои станаа традиција, цел ни е да создадеме широка мрежа во нашето духовно поднебје во областа на медиумите, како во приватниот, така и во јавниот сектор, особено во светлината на дигиталните промени во последните години. Сметаме дека во голема мера успеавме во тоа“, рече тој.

Од 2009 година на работилницата учествувале 619 студенти од 28 земји

Булут изрази надеж дека работилницата ќе биде успешна, велејќи: „Се надеваме дека врз основа на заклучоците што ќе произлезат од оваа работилница ќе дојдеме до резултати што ќе отворат нови хоризонти и ќе дадат насоки за медиумскиот морал, комуникациската етика, вештачката интелигенција и периодот на брза комуникација.“

Членката на РТУК, Фатма Челикер, потсети дека на работилницата „Комуникација со иднината“, која Советот ја организира со голема доследност и визија од 2009 година, досега учествувале 619 студенти од 28 земји.

Поранешниот генерален секретар на Претседателството на Туркије и специјален гостин на работилницата, проф. д-р Мустафа Исен, ја истакна важноста на настанот на кој се дискутира за различните димензии на вештачката интелигенција, особено за етичката димензија и суверенитетот. Тој рече дека историјата на човештвото, на некој начин, е историја на напорите за зачувување на неговата меморија и пренесување на искуствата на идните генерации.

По воведните обраќања, работилницата продолжи со презентации на академски трудови.