Британскиот возач на Ферари во Формула 1, Луис Хамилтон, изјави дека треба да се вложат напори за слободата на Конго, Судан, Сирија и Палестина.

Говорејќи на прес-конференција во Остин пред Големата награда на САД, 41-годишниот возач рече: „Треба да се погрижиме да вложуваме напори за ослободување на Конго, Судан, Сирија и Палестина. Има толку многу мир што се надевам дека ќе го постигнеме во одреден момент“.

Објаснувајќи дека одењето во Руанда не значи игнорирање на она што се случува таму, Хамилтон рече: „Се надевам дека многу луѓе ќе почнат малку повеќе да се информираат за тоа што се случува таму и што се случувало со векови. Се надевам дека ова ќе поттикне дебата“.

Хамилтон истакна дека со години се залага Формула 1 да се врати во Африка и дека со таа цел, повеќепати се сретнал со извршниот директор на Формула 1, Стефано Доменикали, како и со претседатели на неколку африкански земји.

Британскиот возач рече дека Африка, со својата богата култура, заслужува да биде домаќин на трка за Големата награда. Тој оцени дека континентот треба да биде вклучен во наставните програми во училиштата во Велика Британија, додавајќи: „Повеќето проблеми таму сè уште се последица на колонијализмот и интервенциите на Западот“.

„Денес, многу од дизајните на најголемите брендови доаѓаат од Африка, а континентот располага со многу богати природни ресурси. Навистина се надевам дека Африка ќе се обедини. Знам дека има такви кои не го сакаат тоа, бидејќи ако се обединат, ќе бидат многу моќни, но и понатаму се надевам дека еден ден ќе се обединат“, рече Хамилтон.

Се очекува Големата награда на Африка да биде вклучена во календарот на Формула 1 од почетокот на 2030-тите години.

Формула 1 последен пат одржа трка на африканскиот континент во 1993 година, на патеката „Кјалами“ во Јужноафриканската Република.