Хрватската полиција синоќа привела 57 лица кои учествувале во „обид за судир“ на неколку стотици припадници на навивачки групи во центарот на Сплит пред денешниот натпревар меѓу сплитски Хајдук и Ајакс од Амстедам.

Според полицискиот извештај, инцидентот се случил синоќа околу 23:30 часот во центарот на градот, но при тоа нема повредени.

„Синоќа, 14 октомври 2026 година, половина час пред полноќ, имаше обид за судир меѓу неколку стотици демонстранти од двете навивачки групи во центарот на градот. Полициските службеници употребија сила за да го спречат судирот, по што демонстрантите избегаа. Јавниот ред и мир беа воспоставени по 15 минути. Немаше повредени, а 57 лица беа приведени“, соопшти полицијата.

Според нивните информации, околу 150 членови на Торцида учествувале во нападот, а за време на инцидентот биле фрлани пиротехнички средства.

На немирите од синоќа им претходеле неколку инциденти во Сплит. Полицијата претходно пријавила два одделни напади во кои двајца холандски државјани биле полесно повредени. Шест хрватски државјани биле лишени од слобода за овие напади, а уште десет лица биле приведени за поседување недозволени предмети.

Полицијата претходно пријавила и дека во вторникот и синоќа биле приведени 32 лица, меѓу кои 19 странски и 13 хрватски државјани.

Во вторникот, во Сплит биле приведени 19 навивачи на Ајакс, кај кои биле пронајдени ножеви, тули, камења и други предмети „погодни за напад“.

Тие се осудени на седум дена затвор без конечна одлука, а им е одреден и седумдневен притвор.

Фудбалските клубови Хајдук и Ајакс ќе играат натпревар од Конференциската лига на УЕФА на стадионот „Пољуд“ денеска во 18:45 часот.