Në Shqipëri kremtohet sot festa e Pashkëve Ortodokse.
Besimtarët ortodoksë u mblodhën në meshën e mbajtur në Katedralen e Kishës Ortodokse Autoqefale të Shqipërisë në Tiranë, duke kryer ritet fetare.
Meshat dhe ceremoni të tjera me rastin e Pashkëve janë mbajtur edhe në qytetet e tjera të Shqipërisë.
Në Maqedoninë e Veriut besimtarët ortodoksë i nisën mbrëmë festimet në Katedralen “Shën Klimenti i Ohrit” në Shkup, ku u mbajt liturgjia solemne e Ringjalljes së Krishtit, Pashkëve.
Në katedrale dhe në tempuj të tjerë në vend, u organizuan lutje dhe shërbesa fetare, ndërsa shumë qytetarë morën pjesë në kremtime familjare të Pashkëve.
Edhe në vende të ndryshme të botës të krishterët ortodoksë kanë nisur kremtimet, duke marrë pjesë në meshën e Pashkëve, një nga festat më të rëndësishme fetare të botës së krishterë, që simbolizon ditën kur besohet se Jezu Krishti u ringjall.
